Mikil söluaukning hjá Volvo

Árið byrjar vel hjá Volvo í Evrópu en alls seldust 41.423 fólksbílar frá Volvo á fyrstu tveimur mánuðum ársins. Það er aukning um tæplega sjö þúsund bíla frá fyrra ári eða 19,9%. Þetta kemur fram í nýjum tölum frá Acea, samtökum bílaframleiðenda í Evrópu.

Bílasala í Evrópu dregst saman

Það er ekki einungis hér á landi sem bílasala hefur dregist saman frá fyrra ári, það sama á við um Evrópu sem heild. Reyndar er samdrátturinn óvíða jafn mikill og hér en árið 2006 var gífurlega gott í bílasölu á Íslandi. Það sem af er ári hefur nýskráðum fólksbílum í Evrópu fækkað um 1,2% samkvæmt tölum Acea en samkvæmt tölum af vef Umferðarstofu fækkaði nýskráningum fólksbifreiða um 39,2% á fyrstu tveimur mánuðum ársins miðað við sama tímabil í fyrra.

Fimmtungsaukning hjá Volvo á samdráttarmarkaði

Volvo hefur að undanförnu sett á markað bíltegundir sem hafa hlotið mikla athygli og er þessi mikla aukning - fimmtungur - þrátt fyrir að heildarmarkaður fyrir bíla hafi dregist saman, til marks um þá athygli og auknar vinsældir Volvo.